تجربة الطالبة بتول غنام

تجربة الطالبة بتول غنام

قبل ما احكي عالبكالوريا والتجربة اللي عشتها فيها ،بدي قول انو لو مجموعة من الناس عملت رحلة أو مغامرة بشي غابة..فهية حتكون متحمسة بالبداية ومتشجعة كتير..

وبعد فترة بقلب هالرحلة ممكن يطلع لهالناس شي حيوان مفترس يخوفهم..بقوم عدد منهم بيتراجع وببطل يكمل هالرحلة ،وبعد فترة كمان ممكن كتير منهم يديق خلقو من التخييم ومن الأكل "البسيط"يلي بياكلوه وبيشتاق للأكل اللي تعود عليه فبيترك هالرحلة كمان وبيتراجع..

أما البقية فهنن يلي بكملو هالرحلة وبيتحملوا كل شي فيها من الصعوبات والمشقات لحنى ينهوها وهنن مبسوطين ومفتخرين بأنهم ما استسلموا وتحملوا كل الظروف الي عاشوها وكانو قد القرار اللي اتخذوه"قرار الرحلة" هيك هية البكلوريا..

رحلة مدتها 9أشهر..بالنسبة الي كانت هالتسع أشهر بالرغم من كل ما فيها من ضغط وتوتر وخوف وقلق ودموع من أحلى سنين عمري اللي مستحيل انساها..البكلوريا هية فعلا بصمة بحياة كل واحد فينا..لأنو بس الواحد يصير بكلوريا..

بحس بالمسؤولية بحس انو هوة بعد هي السنة اللي رح يتحدد فيها مصيرو وينرسم مستقبلو قدام عيونو لازم يكون إنسان نافع بالمجتمع ولازم يكون الو دور فيه وما يكون متل أي شخص عادي..

أكثر الصعوبات اللي حسيت فيها هالسنة هية ضيق الوقت،فمنت حس إني مالي بحاجة لشي'والحمد لله' غير للوقت وكنت مر بلحظات ضيق حس انو مافي غير رب العالمين يهونها وييسرها كنصيحة مني بعد تجربة "البكالوريا العلمي"

 بدها عزيمة..بدها نية صادقة..بدها إخلاص..بدها انو نمسك الدراسة بجد من أول السنة وما نأجل شي..

وبالنسبة لشهر الدراسة..أهم شي انو كل واحد يحط البرنامج اللي بناسبه وبريحه وما يشوش حاله بالبرامج اللي بتحطها المدارس مهما كان مصدرها..

وشغلة كتير شفتها قدامي وكتير بحذر كل طالب منها..انو يترك دراسة شي مادة للتكميلي..

أحسن شي انو الواحد يعتبر انو مافي تكميلي ويدرس كل المواد من قلبه وبعدين بيستعين بالتكميلي إذا احتاج يحسن علاماته... 

أهم الدروس اللي تعملتمها هالسنة وأيقنت فيها..: *إن الله لايضيع أجر من أحسن عملا *قل لن يصيبنا إلا ما كتب الله لنا..

وأكتر شي كنت ادعي:"اللهم اجعل لي من كل هم فرجا ومن كل ضيق مخرجا وارزقني من حيث لا أحتسب "... 

والحمد الله انو خلصنا امتحاناتنا على خير والله يكملها معنا بأحسن العلامات ويكتبلنا الخير ياااارب
 

ما هي ردة فعلك؟

like
2497
dislike
0
love
172
funny
0
angry
0
sad
0
wow
3